16.11.2023
Suw — jasıllıqtıń egizi yaki Milliy baǵ hám onıń ishindegi kól haqqında
Aldınları “Komsomol kóli” atı menen belgili bolǵan úlken kólge iye bolǵan Alisher Nawayı atındaǵı Milliy baǵ 1939 -jılda ashılǵan. Onıń jaratılıwında qala xalqınıń ózi qatnasqan. Adamlar óz qalaları orayında kem ushıraytuǵın jasıl oazisti qurıw ushın shembilikke shıqqan eken sol waqıtlarda.
Baǵ Tashkent qalasındaǵı aymaǵı boyınsha eń úlkeni bolıp, onıń maydanı 65 gektarǵa teń hám házirde olar “Jazıwshılar qıyabanı”, “Magic City” hám jańalanǵan “Komsomolskiy” kóli átirapında qayta qurılǵan Milliy Baǵqa bólingen.
Plyaj benen jańalanǵan kóldiń maydanı 33 mıń kvadrat metrdi quraydı. Kól menen baǵ 2017- jıldıń gúzinde rekonstrukciya ushın jawılıp, 2022-jıldıń avgustında xalıq ushın qayta paydalanıwǵa tapsırılǵan.
Basqarıw imaratı, restoranlar qurılıp, kópirler hám koridorlar jańalanǵan. Suw sızıp shıqpawı hám ılaylanbawı ushın kól túbine arnawlı qatlamlar jatqızılǵan. Jaǵaları tártipke keltirilip, shomılıw háwizi islengen. Mıńnan zıyat terek, 200 mıńǵa jaqın puta nálleri egilgen.
Derlik 5 jıl dawamında jawıp qoyılǵan baǵda qurılıs -rekonstrukciya jumısları sebepli bir neshe onlap, itimal júzlegen terek-putalarǵa zıyan jetkizilgen bolsa-da, onıń búgingi jaǵdayı, qayta tiklengen kól, jasıllıq kózdi quwantadı. Qadaǵalawshılar tásiri astında bolsa-da, adamlardıń tábiyatqa sanalı múnásibetin kórip ish-ishińizden suwdı pataslamastan, júrgen jolına shıǵındı taslamastan, terek hám putalarǵa, jasıl shóplerge ziyan jetkizbey-aq jasawǵa boladı eken-ǵo, degen dawıs keledi.
Javhar Chorshanbiyeva
Foto
