14.11.2023

Shomiliw múmkin emes, biraq shıǵındı taslasa boladı (ma?)

Erte tań, jaqsı keypiyat penen úyden shıǵasań. Hawa rayı da arnawlı buyırtpa etilgendey…

Bir qaraǵanda hámmesi ornındaday kórinedi. Biraq úyińnıń aldınan aǵıp ótetuǵın kanalda bir úyim shıǵındı jıynalıp qalǵanın kórip, keypiyatıń buzıladıı. Kanalǵa túsip, onı tazalayın deseń jumısqa asıǵıp atırsań, tek ótip ketseń, sol shıǵındını taslaǵanlardan parqıń qalmaydı. Mende de sonday boldı.

Azan menen jumısqa ketip baratırsam, “Dream Park”tıń usınday bir shetinen aǵıp ótetuǵın kanalda bir úyim plastik ıdıslar, hár qıylı shıǵındılar jıynalıp qalǵanın kórdim. Sol waqıtta kózim “Shomılıw múmkin emes” degen jazıwǵa tústi. Rasında da shıǵındı tolı kanalda shomılıw múmkin emes dep oyladım. Qolımdaǵı telefonda bir neshe ret súwretke alıp, juwapkerlerge jetip barar degen isenim menen sociallıq tarmaqtaǵı betime jaylastırdım.

Nátiyje de kutilgenindey boldı. Ekologiya ministrliginen bir xızmetker maǵan baylanısıp, mashqala saplastırılǵanın ayttı. Quwandım.

Juwmaq, tábiyat hámmemizdiki, onıń tazalıǵına qaysıdur mámleketlik shólkem emes, usı watanda jasaytuǵın hár bir puqara birdey juwapker bolıwı kerek.

Karim Zaripov

Foto