14.11.2023
Jawın suwı paydalıma?
Eki kúnnen berli Tashkentte hawa rayınıń keypiyatı joq: jawın jawıp atır. Bunı baqlap turıp oyıma jawın suwınıń paydalı tárepleri barma degen soraw keldi.
Jawın suwınan qanday maqsetlerde paydalanıwdı biliw júdá zárúr. Sebebi biz odan ónimli paydalanıwımız múmkin. Bultlarda bar bolǵan jawın suwınıń jawın formaları suwlı tamshı kórinisinde yamasa qattı jaǵdayda qar yamasa burshaq formasında jawıwı múmkin.
Jawın suwı bul bultlar suwıp ketkende payda bolatuǵın suyıq suw jawın forması bolıp tabıladı. Bultlardaǵı temperatura Celsiy boyınsha nol dárejeden tómenge túskende, suw tamshıları kólemi hám salmaǵı asadı, tamshılar sonshelli awırlasadı, olar endi júzbeydi hám jawın bolıp jawadı.
Eger jawın suwı kislotalı quramnan payda bolmasa, taza boladı. Onı toplaw ushın úlken muǵdarda pul kerek emes. Jawın suwın saqlaw múmkin jáne bul biypul. Onı qayta islew arqalı ishiw de múmkin. Bunnan tısqarı, jawın jawıwı artınan jer astı suwi júzesi kóteriledi, jurtımızda suw menen támiyinleytuǵın tiykarǵı dáryalar qar hám jawın suwınan toyınadı. Onıń quramındaǵı azot báhár hám jaz aylarında ósimliklerdiń tezirek ósiwine járdem beredi. Hawa temperaturası, ıǵallıq, ulıwma alǵanda, tiriliktiń kóp faktorları jawın hám onıń suwı menen baylanıslı. Tap-taza ishimlik suwı sıyaqlı jawın suwınan da aqılǵa say paydalana alsaq, suw jetispewshiligi menen baylanıslı bir qansha mashqalalardıń aldın alıw hám sheshiw múmkin.
Javhar Chorshanbiyeva
Foto
